Tuesday, September 15, 2009

قدرة الله ..تحدث النفس..مواقف

السلام عليكم ورحمة الله وبركاته
********************


اولا: اسفة جدا وبشدة عن عدم الكتابة اه بدخل النت وكده ..لكن لما بكتب موضوع دينى بالذات بحب اكتبه بتركيز وبتأنى لان ههحاسب عليه.
ثانيا: اشكر الناس اللى تابعت معايا واللى كتبوا كومنتات ومروا بمدونتى
ثالثا: كل سنة وانتم كلكم طيبين لقدوم عيد الفطر المبارك


موضوع النهاردة بقى
عن تساؤل النفس والاجوبة المرسلة من الله للعباد والكلام ده بيتحس امتى وازاى ولمين؟؟
اولا معروف ان النفس بتتشكل فى ثلاث اشكال يا اما لوامة يا اما مطمئنة يا اما وامارة بالسوء اللى احنا بنسميها النفس العاصية
او المتمردة


تمام..

النفس كتير جدا بتحدث نفسها وعلى فكرة الكل بيوصله اجابة الا بقى المضلين و اللى عاوزين يكونوا بالضلال

فمهما حتى وصل ليهم رسايل.. اجابة.. انذار.. تبشير ..هما فى الطراوة اصلا

سبحان الله ..ربى له فى خلقه شئون


فا هحكى موقف مريت بيه على موضوع الى اى مدى قدرة ربنا سبحانه وتعالى التى ليس لها مثيل او حدود فى قراءة نفس الانسان


او ما بداخله


قعدت فترة وصلت لكام شهر حوالى 3 او 4 شهور الشيطان الله يلعنه عمال يخرب فى دماغى

اقعد اسبح يكرهنى فى القرآن وفى الاسلام

اقول الله هو انا اتلبست ولا ايه من كتر القعاد بليل؟؟!!

المهم حصل بينى وبين نفسى وبين الشيطان حرب نفسية شديدة اكاد اكون كنت ببكى بليل لانى مش راضية عن كده

الله اعلم اذا كان ابتلاء او عقاب ..الله تعالى اعلى واعلم

و بدأت بالفعل اقعد مع نفسى اشوف عملت ايه وكل الاحداث اللى فاتت ومش لاقية سبب بل بالعكس الفترة دى كنت بعمل خير فى السر والعلن


وجالى انذار كتير ان الله ليس بظلام للعبيد ..ومرة اشوف حد من اصحابى جاى بالمنام ومعاه ايات قرآنية بالعذاب


قولت لا بقى انا اكيد عملت بلوة ..المهم افتكرت انى فى مرة تساهلت ومش ارتديت العباية مش كانت مجهزة للخروج فلبست جيبة والجيبة كانت مفتوحة شوية


لفتت النظر وبتاع وانا ولا حاطة بدماغى ..قولت ربنا يسامحنى بقى


طبعا دى كانت غلطة لان مينفعش التزم بشدة وارجع تانى ..طبعا الانسان اللى على علم غير الجاهل وحسابه اشد


المهم بدأت استغفر وبتاع وسامحنى يارب والحمدلله ربنا تقبل


موقف آخر


بدأت اقرأ بالمصحف فجاءت آية عن ان الشيطان بيعذب بالنار


فجوه نفسى بقول يارب ازاى ده بيعذب بالنار وهو اصلا مخلوق من نار؟؟


المهم ازاى معرفش سيبت المصحف وبحول فى التلفاز لاقيت شيخ بيقول مذءوما مدحورا


وجاوب على السؤال اللى بسأله لنفسى ان الشيطان بيعذب بالنار بطريقة معينة


قولت سبحان الله ..يجوز صدفة

جيت مرة اخرى ..حبيت بقى انزع حب واحط كراهية بقلبى لشخصية ما


وبرضو فى نفسى واشتمه وبتاع ...الاقى شىء الهى يقول ده والله غلبان


اخبط كف على كف واتكلم بقى اقول يارب ده غلبان ازاى بس


ده بيأذى الناس بوعى وبدون وعى ومشاعرهم ..الخ


الاقى نفس الرد ده غلبان


ودى بتكون رسايل على لسان الناس اللى احنا بنقول ان جنود الله ربنا باعتهم لتوضيح رسالة او اجابة!!!!!!!!!!


ففعلا بجد اى حد بيفكر فى نفسه وبيسعى عشان يكون كويس ... ربنا هيفسح له الطريق وهينورهوله وهيديله اللى هو عاوزه


لكن بقى طلع انسان بوشين وبيتمنظر وخلاص ..ده يبقى بالسلامة


ومن آيات القرآن الكريم اللى مأثرة فيا اوى


بسم الله الرحمن الرحيم


ولقد خلقنا الانسان ونعلم ما توسوس به نفسه ونحن اقرب اليه من حبل الوريد*



سورة ق من الآية 16 لغاية 35


ربنا سبحانه وتعالى بيتكلم فيها عن الانسان تفسير الايات بسلاسة كده


ان ربنا سبحانه وتعالى خلقنا وعارف بالضبط انت بتفكر فى ايه؟؟ ونيتك و تساؤلاتك؟؟واقدامك على افعال من خير او شر...الخ


فصورها فى الاية الكريمة بأن الوريد الذى يتمثل فيه حياتنا هو اقرب الينا منه


سبحان الله


وفى الاية الكريمة اللى بعدها عن رقيب وعتيد دول ملائكة رسالتهم انهم يكتبوا الاعمال وبس ملهومش فى التدخل فى شئون الانسان


غير بكتابة الاعمال ودول طبعا احنا مش بنشوفهم


ويقوموا بكتابة اى لفظ اى بصة اى همسة


ناس كانت بتقول ربنا بيحاسب على السيئة لو اقدمنا عليها لكن مش بيحاسب لو مش فكرنا فيها


ماشى انا معاكم ..لكن فى آية اخرى بتقول


بسم الله الرحمن الرحيم


وان تبدوا ما بأنفسكم او تخفوه يحاسبكم به الله فيغفر لمن يشاء ويعذب من يشاء والله على كل شىء قدير


تمام..


نكمل آيات سورة ق


الاية رقم 19 بتعنى لما الواحد بيذوق سكرات الموت كان قبلها بيعمل وبيظلم وبيحسب نفسه خالد فيها ميعرفش انه سايب الدنيا زيه زى غيره فربنا سبحانه وتعالى قاله ادى الموت الموت حق


الاية اللى بتتكلم عن كل نفس معها سائق وشهيد


الايدى والارجل كل حاجة هتشهد عليك والملائكة كمان على فكرة زى كل واحد ليه قرين ليه كمان ملاك هيشهد عليه يوم القيامة


فربنا سبحانه وتعالى يقول للانسان ياااه ده انت كنت فى غفلة هنكشف بقى عن بصرك ونورهولك عشان تشوف اللى كانوا بيكتبوا عملك فى الدنيا
فى حتة كده عايزة اقولها العلم البارسيكولوجى وما يتحدث به عن علم التخاطر وازاى الانسان ينظر للمكان ويرسمه فى ذهنه عشان يعرف يشوفه لما يغلق عينه بنفس الصورة
ده نوع من انواع التدريب على كشف الغطاء لكن سبحان الله ممكن الانسان يشوف جن ومش يشوف ملاك
وممكن العكس وممكن الاتنين وممكن ميشوفش لا ده و لا ده
لييييييييييييييه؟؟؟
لان ربنا سبحانه وتعالى زى ما اصطفى من البشر رسل..اصطفى من الناس صالحين وعارفين به
لكن رغم ان سيدنا محمد صلى الله عليه وسلم رأى سيدنا جبريل بالعين المجردة الا انه لم يرى رقيب وعتيد
سبحانك يارب ...هتقولولى ازاى يعنى هقولكم اقرئوا الاية كويس
شهادة اعضاء الجسد و رقيب عتيد يوم القيامة ولا ترى هذه الملائكة لاى حد مهما كان بالدنيا
لان حتى الرسل ذات انفسهم هيحاسبوا
المهم
الانسان بقى عرف عمله ويقول لا ده قرينى وقرينه يقول ده هو اللى كان فى ضلال انا مليش دعوة بيه
فربنا سبحانه وتعالى يقولهم انتوا جايين تختصموا امامى ..ما خلاص الامر ده اتحسم وده يوم الوعيد
وربنا بيقول دائما فى آياته انه ليس مبدل لكلماته وانه مش ظلام للعبيد لان فعلا العبيد هما اللى ظالمين انفسهم بنفسهم
آه فى حتة برضو عاوزة اتكلم فيها هى عن عبادة الانسان مع الله آلها آخر
هو مش موضوع صنم وبتاع ....لالا ممكن الانسان من كتر حبه لاحدى الشهوات
يوصل فيها الانسان لعابد ليها
هتقولولى ازاى؟؟؟؟
يعنى واحد بيحب الفلوس اوى زى ما قال الداعية عمرو خالد
واحد بيطلع فى الروح بالطيارة واللى جانبه بيقوله قول لااله الا الله
الراجل ماسك فى شنطته وفلوسه وحاله وبيقوله يا اخى مش قادر انطقها
كذلك برضو شهوة الجسد ..ومع الاسف ناس كتير عندهم الجسد ده اساس
اللهم احفظنا ..بيفضلوا منغمسين فى النجاسة ..طيب ده هيذكر ربنا امتى اصلا وو على طول عبد لجسده واسير لشهواته
ده بقى فى الضياع اصلا
اخر آية بقى فى سورة ق هى بتفسر ان ربنا سبحانه وتعالى
بيقول للرسول انت ليس بجبار على الناس يعنى مش تحارب وتضرب وتقهر انت بس هتحذرهم وبمعنى اصح حذر اللى يخاف الوعيد ..اللى يخاف الله ويخاف غضبه وعذابه
اللى هما مين؟؟؟؟
المؤمنين
يلا بقى السلام عليكم ورحمة الله وبركاته

1 comment:

موناليزا said...

كل سنة وانتى طيبة يا هبة ياجميلة
ويارب يكون عيد سعيد علينا جميعا